main jis irade se ja rahi huun usi irade se lad padungi
mire sipahi ko kuchh hua to main shahzade se lad padungi
ye khel shahon ke martabe ka hadaf banenge hamare mohre
main bebasi men shikast khaae hue piyade se lad padungi
main apni basti ki kachchi galiyon se ishq karti huun yaad rakhna
agar jo achchha bura kahega amir-zade se lad padungi
asir-e-naqsh-o-nigar mujh se nahin sambhalta ye chak-e-hasti
main thak gai to bikharti mitti se aur burade se lad padungi
ye sabr kab tak nibhae jaun main khud se nazren churae jaun
jo sham-e-hijran ne jaan khaai har ek vaade se lad padungi
Leave a Reply