ai junun hote hain sahra par utare shahr se
fasl-e-gul aai ki divane sidhare shahr se
khuub roe haal par apne vatan ka sun ke haal
koi ghurbat men jo aa nikla hamare shahr se
jaan dunga main asiir ai dosto chupke raho
zikr kya us ka ki divana sudhare shahr se
mausam-e-gul men raha zindan men aur aai na maut
samne hoti nahin hai aankh saare shahr se
josh-e-vahshat men jo li zindan se main ne rah-e-dasht
kud-kan mujh ko khuda-hafiz pukare shahr se
paanv men majnun ke to taqat nahin ai kudko
mausam-e-gul ki hua tum ko ubhare shahr se
ik nazar lillah ham ko surat-e-zeba dikhao
tishna-e-didar jaate hain tumhare shahr se
dasht-gardi ki nahin divane ko kuchh ehtiyaj
jaame se bahar jo hai bahar hai saare shahr se
uunt si lagti hai dil jangal se hota hai uchat
sang-e-tiflan karte hain mujh ko ishare shahr se
lash-e-vahshat se nahin pahuncha main sahra tak hanuz
jaane vaale gor ke pahunche kinare shahr se
mausam-e-gul aai niyyat ser divanon ki ho
meva-e-sahrai par hain munh pasare shahr se
ab to azurda hai tu lekin malega haath phir
jis ghadi ‘atish’ nikal javega pyare shahr se
Leave a Reply