Yun to Aashiq Tera Zamana Hua

yuuñ to āshiq tirā zamāna huā

mujh sā jāñ-bāz dūsrā na huā

ḳhud-ba-ḳhud bū-e-yār phail ga.ī

koī minnat-e-kash-e-sabā na huā

maiñ giraftār-e-ulfat-e-sayyād

daam se chhuT ke bhī rihā na huā

ḳhabar us be-ḳhabar kī lā detī

tujh se itnā bhī ai sabā na huā

un se arz-e-karam to kyā karte

ham se ḳhud shikva-e-jafā na huā

ho ke be-ḳhud kalām-e-hasrat se

aaj ‘ġhālib’ ġhazal sarā na huā

Leave a Comment