Gulzar Dehlvi
ek kafir-ada ne luuT liya
un ki sharm-o-haya ne luuT liya
ik but-e-bevafa ne luuT liya
mujh ko tere ḳhuda ne luuT liya
ashna.i buton se kar baiThe
ashna-e-jafa ne luuT liya
ham ye samjhe ki marham-e-gham hai
dard ban kar dava ne luuT liya
un ke mast-e-ḳhiram ne maara
un ki tarz-e-ada ne luuT liya
husn-e-yakta ki rahzani tauba
ik fareb-e-nava ne luuT liya
hosh-o-iman-o-din kya kahiye
shoḳhi-e-naqsh-e-pa ne luuT liya
rahbari thi ki rahzani tauba
ham ko farman-rava ne luuT liya
ek shola-nazar ne qatl kiya
ek rangin-qaba ne luuT liya
ham ko ye bhi ḳhabar nahin ‘gulzar’
kab but-e-bevafa ne luuT liya
haa.e vo zulf-e-mushk-bu tauba
ham ko bad-e-saba ne luuT liya
un ko ‘gulzar’ main ḳhuda samjha
mujh ko mere ḳhuda ne luuT liya
Leave a Reply