aḳhir bigaḌ ga.e mire sab kaam hone tak
ik umr lag ga.i mujhe nakam hone tak
dilkash dikha.i dete hain jo log sub.h-dam
un par nazar na Daloge tum shaam hone tak
jis ishq ko chhupane men ik umr lag ga.i
ik pal laga hai us ko sar-e-am hone tak
qimat miri zara si mohabbat thi dosto
par muddaten lagin mujhe nilam hone tak
duniya ne ‘zeb’ mujh ko kahin ka nahin rakha
lekin main chup huun zaat men kohram hone tak
Leave a Reply