Irfan Sattar
ye ḳhabar hai, mujh men kuchh mere siva maujud hai
ab to bas ma.alum karna hai ki kya maujud hai
ek main huun, jis ka hona ho ke bhi sabit nahin
ek vo hai jo na ho kar ja-ba-ja maujud hai
haan ḳhuda hai, is men koi shak ki gunja.ish nahin
is se tum ye mat samajh lena ḳhuda maujud hai
hal kabhi hota nahin ye jism se chhuTe baghair
main abhi zinda huun so ye mas.ala maujud hai
taab ankhen la saken us husn kii, mumkin nahin
main to hairan huun ki ab tak aa.ina maujud hai
raat kaTti hai maze men chain se hoti hai sub.h
chandni maujud hai bad-e-saba maujud hai
raushni si aa rahi hai is taraf chhanti hui
aur vo hiddat bhi jo zer-e-qaba maujud hai
ek pal fursat kahan dete hain mujh ko mere gham
ek ko bahla diya to dusra maujud hai
dard ki shiddat men bhi chalti hai mere dil ke saath
ik dhaḌakti raushni jo har jagah maujud hai
mo’tabar to qais ka qissa bhi hai is zimn men
is havale se mira bhi vaqi.a maujud hai
ḳhvab men ik zaḳhm dekha tha badan par jis jagah
sub.h dekha to vahan ik daagh sa maujud hai
ek hi sho.ale se jalte aa rahe hain ye charagh
‘mir’ se mujh tak vahi ik silsila maujud hai
yuun to hai ‘irfan’ har ehsas hi mahdud sa
ik kasak si hai ki jo be-intiha maujud hai
Leave a Reply