Taseer Jafry
tanha.i se sahra se na dariya ke bhanvar se
vahshat mujhe hoti hai mire apne hi ghar se
chunna hai mujhe dil bhi abhi qarya-ba-qarya
ankhen bhi uThani hain tiri rahguzar se
ik nazar-e-karam ke liye kaun umr guzare
ik bosa-e-lab ke liye kab tak koi tarse
mat apni karimi ke suna.e mujhe qisse
vo abr-e-karam hai to mire dasht pe barse
jis shaḳhs pe ehsan abhi main ne kiya hai
mahfuz ḳhuda rakkhe usi shaḳhs ke shar se
kaTne na diya sahn se is vaste ‘tasir’
ḳhushbu-e-vafa aati hai is buḌhe shajar se
Leave a Reply