muft hai ḳhun-e-jigar azmat-e-kirdar ke saath
ashk milte hain yahan dida-e-bedar ke saath
ham ne manga tha sahara to mili is ki saza
ghaTte baḌhte rahe ham saya-e-divar ke saath
aaj to hazrat-e-naseh bhi lipaT kar mujh se
raqs karte rahe zanjir ki jhankar ke saath
dil-e-barbad pe hai saya-fagan yaad tiri
saya-e-fazl-e-ḳhuda jaise gunahgar ke saath
dil men us shahr ke kuchh aks abhi baaqi hain
luT ga.e ham bhi jahan garmi-e-bazar ke saath
aisi basti se to vo dasht kahin behtar tha
aable mil ke jahan rote the har ḳhaar ke saath
ab to ik ḳhvab si lagti hai haqiqat ye bhi
rabt tha ham ko kisi yar-e-tarah-dar ke saath
dil men mere bhi yaqin aur guman saath rahe
jaise inkar tire lab pe hai iqrar ke saath
aise anmol na the ham ki na bikte lekin
do qadam chal na sake apne ḳharidar ke saath
hasil-e-fan hain ‘faridi’ vahi ash.ar-e-ghazal
ḳhun-e-dil jin men ho rangini-e-afkar ke saath
Leave a Reply