Khursheed Rizvi
milta hi nahin dard ka paikar koi mujh sa
a.ine men ik shaḳhs hai kamtar koi mujh sa
iman bhi tanha hai mira kufr bhi tanha
momin koi mujh sa hai na kafir koi mujh sa
hai kaun jo is abr ke parde men ravan hai
divana hai divana sarasar koi mujh sa
kohsar ke daman men milata hai nihan kaun
avaz se avaz barabar koi mujh sa
lene nahin deta kisi karvaT mujhe aram
ik shaḳhs haTila mire andar koi mujh sa
main TuTta taara huun nazar mujh se mila lo
phir kaahe ko dekhoge mukarrar koi mujh sa
a.ina huun aur chehra-e-‘ḳhurshid’ pe va huun
hoga kahin qismat ka sikandar koi mujh sa
Leave a Reply