sub.h ho shaam juda.i ki ye mumkin hi nahin
hijr ki raat vo hai jis ke liye din hi nahin
sub.h karna shab-e-gham ka kabhi mumkin hi nahin
aa ke din pher de apne vo koi din hi nahin
dil-e-be-tab mohabbat ko ho kis tarah sukun
donon harfon men jab us ke koi sakin hi nahin
kya mazammat hai mujhe sub.h-e-shab-e-hijr un se
jin se kahta tha ki bachna mira mumkin hi nahin
shab-e-furqat use maut aa ga.i mere badle
de azaan sub.h ki kaun aaj mo.azzin hi nahin
bistar-e-gham se uTha kar ye biThata hai hamen
koi juz dard-e-jigar aur muavin hi nahin
raah chalte bhi ye puchhen ki kidhar aa nikle
jaise ham kucha-e-mahbub ke sakin hi nahin
yad-e-gesu ne dikhaya hai vo aalam ham ko
raat rahti hai jahan aaTh pahar din hi nahin
banda-e-ishq hain iman ki kahte hain ‘jalal’
ham ko kafir jo samajhta hai vo momin hi nahin
Leave a Reply