Salam Machhli Shahri
kabhi kabhi arz-e-gham ki ḳhatir ham ik bahana bhi chahte hain
jab ansuon se bhari hon ankhen to muskurana bhi chahte hain
vo dil se tang aa ke aaj mahfil men husn ki tamkanat ki ḳhatir
nazar bachana bhi chahte hain nazar milana bhi chahte hain
maza jab aa.e ki intiqaman main dil ka a.ina toḌ Dalun
mire hi hathon saje hain aur ab mujhi pe chhana bhi chahte hain
jabhi to ḳhud aaj shahr ke gul-ruḳhon ki tarif kar rahe hain
vo intiḳhab-e-nazar ko mere ab azmana bhi chahte hain
agarche tufan-e-rang-o-bu ki sharir lahron se thak chuke hain
magar vo dil ke na.e talatum ki zad men aana bhi chahte hain
‘salam’ azad sha.eri ki tavil o dushvar raah men ham
kabhi kabhi barbat-e-taghazzul pe gunguna bhi chahte hain
Leave a Reply