Poet
baat ka apni na jab paaya javab
ham ye samjhe vo dahan hai la-javab
baten sunva.in lab-e-ḳhamosh ne
varna ham dete use kya kya javab
be-nishan hai vo kamar shakl-e-dahan
kaun si shai hai nahin jis ka javab
saada kaghaz bheja naame ke evaz
vaan se aaya bhi to saaf aaya javab
puchhta gar us kamar ka main nishan
ghaib se milta mujhe is ka javab
tum jo kuchh kahte zaban-e-tegh se
main dahan-e-zaḳhm se deta javab
aaj mujh se baat agar karte nahin
denge ye but kal ḳhuda ko kya javab
be-dahan vo hai to main huun be-zaban
yaar ki surat huun main bhi la-javab
kah ke ik misra.a mah-e-nau rah gaya
ho saka kab bait-e-abru ka javab
baat sidhi ki jo tha mazkur-e-qad
zikr-e-abru men diya TeḌha javab
kijiye kya baat us kaj-tab.a se
dega charḳh-e-vazhgun ulTa javab
baten karta hai jo parda chhoḌ kar
mujh ko deta hai vo dar-parda javab
aa gaya ai vaa.e paigham-e-ajal
par na qasid le ke kuchh aaya javab
sun ke baiten mere hasid chup rahe
ai ‘vazir’ apna suḳhan hai la-javab
Leave a Reply