gar bade mard ho to ghair ko yaan ja diije
us ko kah dekhiye kuchh ya mujhe uthva diije
kaun aisa hai jo chhede hai tumhen raah ke biich
main samajh lunga tuk us ko mujhe batla diije
dil o jaan o ḳhirad o diin pahle hi din de baithe
aaj hairan huun ki aata hai use kya diije
kya hua haal bhala dekh to mujh be-dil ka
na kabhi dilbari kiije na dilasa diije
daava-e-rustami karte to hain par ik dam men
chhin luun tegh-o-sipar un ki jo farma diije
gum hua hai abhi yaan gauhar-e-dil ai ḳhuban
haath lag jaave tumhare to mujhe pa diije
bevafa dushman-e-mehr afat-e-jan sangin-dil
haif ‘bedar’ ki aise ko dil apna diije