ik ḳhali chand hi lab-e-ju rakhna tha
us ke hijr ka ye bhi pahlu rakhna tha
sab ka daman motiyon se bharne vaale
meri aankh men bhi ik aansu rakhna tha
suraj karna tha meri peshani ko
is miTTi men ye bhi jaadu rakhna tha
kis ki ankhen kahan ki ankhen harf huiin
patthar the to ḳhud par qaabu rakhna tha
kiya tha us ke naam ki lau ko raushan jab
dilon men aks-e-ḳhiram-e-ahu rakhna tha
jab hasil la-hasil donon ek se the
phir ḳhud ko na asir-e-man-o-tu rakhna tha
yaad ka ḳhanjar utarna tha siine men
der tak ik manzar ko ḳhushbu rakhna tha
ik aalam se bhar kar us ki jholi ‘tur’
apni hatheli par barg-e-hu rakhna tha
Leave a Reply