is inkisar ka idrak tujh ko kam hoga
mire charagh ki lau men bhi thoḌa nam hoga
lapak paḌunga main tasvir se tiri janib
ye teri samt mira aḳhiri qadam hoga
guzishta raat mujhe siḌhiyon men yaad aaya
tiri thakan ka sabab bhi kisi ka gham hoga
main janta tha mujhe raushni vadi.at hai
main janta tha mire haath men qalam hoga
hamare sanehe tahdar kar diye ga.e hain
hamari tirgi ka aag se janam hoga
main ḳhushk jhiil men sahmi hui nami huun dost
mira machheron ke giton se ḳhauf kam hoga
safar men us ko agar peḌ kam paḌe ‘arish’
to us ka rasta mire raste men zam hoga
Leave a Reply