Poet
gham huun jo apne aap men rista dikha.i de
dariya men Duub kar hi kinara dikha.i de
dekho jo ghaur se kabhi chehron ki vahshaten
abadiyon men bhi tumhen sahra dikha.i de
suraj ki raushni men kabhi apni samt dekh
tarikiyon men kya tujhe saaya dikha.i de
nazron men bas gaya mire dil men utar gaya
surat se ajnabi ki jo apna dikha.i de
ḳhvabon ke sahilon ki taraf dekhta hai kaun
chaḌhta hua jo dard ka dariya dikha.i de
is shahr-e-be-charagh men chehra vo chand sa
aa.e jo apne samne kaisa dikha.i de
kohram sa hai siine ke andar macha hua
ḳhushiyon se baagh baagh ye chehra dikha.i de
kya qahr hai jo raunaq-e-mahfil tha ai ‘nadim’
vo shaḳhs shahar-bhar men akela dikha.i de
Leave a Reply