jab main na huun to shahr men mujh sa koi to ho
divar-e-zindagi men daricha koi to ho
ik pal kisi darakht ke saae men saans le
saare nagar men janne vaala koi to ho
dekhe ajiib rang men tanha har ek zaat
in gahre paniyon men utarta koi to ho
dhundoge jis ko dil se vo mil jaega zarur
aenge log aap tamasha koi to ho
phir koi shakl baam pe aae nazar kahin
phir rahguzr-e-am men rusva koi to ho
koi to arzu-e-farozan sambhal rakh
haan apne sar pe qarz-e-tamanna koi to ho
har-dam ilaj-e-mehr-o-vafa dhundte raho
is tirgi men ghar ka ujala koi to ho
‘nahid’ bandishon men muqayyad hai zindagi
jaaen hazar baar bulava koi to ho
Leave a Reply