Arzoo Lakhnavi
ai mire zaḳhm-e-dil-navaz gham ko ḳhushi bana.e ja
a.ankhon se ḳhuun baha.e ja honTon se muskura.e ja
jaane se pahle bevafa shab ko sahar bana.e ja
dil ko bujha ke kya chala sham.a ko bhi bujha.e ja
saans ka taar TuuT jaa.e TuuTe na taar aah ka
ek hi lai pe gaa.e ja ek hi dhun baja.e ja
hukm-e-talab ke muntazir shauq ki aabru na kho
sar ko qadam bana ke chal a.ankhon se be-bula.e ja
le vo dava-e-talḳh hai jis ka asar hai ḳhush-gavar
piine men munh bana.e ja dil men maze uTha.e ja
joshish-e-chashm-e-ashk-bar muft na rakh karam ka baar
meri lagi to bujh chuki apni lagi bujha.e ja
manzil-e-be-ḳhudi-e-shauq hadd-e-nazar se duur hai
pichhe palaT ke bhi na dekh aage qadam baḌha.e ja
ik hama-tan hai pa-e-naz ik hama-tan sar-e-niyaz
ye to chalan jahan ka hai jitna de daba.e ja
zarf-e-sharab tere paas zuruf-e-surur mere paas
dil to nahin ba-qadr-e-jam dekh na munh pila.e ja
donon hain naz-e-dilbari zid men hai jin ki aur lutf
ek taraf laga.e ja ek taraf bujha.e ja
chand men gum chakor ḳhud chand kahin chhupa hua
apni talash ḳhatm kar us ka pata laga.e ja
‘arzu’ us se kah do saaf gham ka asar hai der-pa
jald hansi na aa.egi aur abhi gudguda.e ja
Leave a Reply