ai sanam der na kar anjuman-ara ho ja
meri dam toḌti nazron ka sahara ho ja
apne daman men chhupa le mujhe mahbub mire
miri bigḌi hui qismat ka sitara ho ja
ishq sachcha hai to phir rang-e-dui Thiik nahin
ham tire ho ga.e ab tu bhi hamara ho ja
mujh ko har vaqt hai lazzat-e-didar-e-sanam
meri nazron ke liye aisa sahara ho ja
meri chahat ka do-alam men bharam rah jaa.e
tu mujhe meri mohabbat se pyara ho ja
us ko paana hai to kashti se kinara kar le
Duub kar bahr-e-mohabbat ka kinara ho ja
huun ‘fana’ ishq men tere tira kahlata huun
meri taqdir badal mera sahara ho ja
Leave a Reply