ye aadmi ki guzargah-e-shahrah-e-hayat
hazaron saal ka bar-e-garan uthae hue
jabin pe katib-e-taqdir ki jali tahrir
gale se saikdon naqsh-e-qadam lagae hue
guzarte vaqt ke gard-o-ghubar ke niche
hasin jism ki tabindagi chhupae hue
guzishta daur ki tahzib ki manazil ko
javan maan ki tarah god men sulae hue
ye aadmi ki guzargah-e-shahrah-e-hayat
hazaron saal ka bar-e-garan uthae hue
idhar se guzre hain changez-o-nadir-o-taimur
lahu men bhigi hui mishalen jalae hue
ghulamon aur kanizon ke karvan aae
khud apne khuun men duube hue nahae hue
shikasta dosh pe divar-e-chin ko laade
saron pe misr ke ehram ko uthae hue
jalal-e-shaikh-o-shikoh-e-barhamani ke julus
havas ke sinon men atish-kade chhupae hue
jahalaton ki tavil-o-ariz parchhain
tavahhumat ki tarikiyan jagae hue
safed qaum ke ayyar tajiron ke giroh
fareb-o-makr se apni dukan sajae hue
shikast-khurda siyasi gadagaron ke hujum
adab se tuuti hui gardanen jhukae hue
ghamon se chuur musafir thake hue raahi
charagh-e-ruh ke dil ke kanval bujhae hue
ye aadmi ki guzargah-e-shahrah-e-hayat
hazaron saal ka bar-e-garan uthae hue
nae ufuq se nae qafilon ki aamad hai
charagh-e-vaqt ki rangin lau badhae hue
baghavaton ki sipah inqalab ke lashkar
zamin pe paanv falak pe nazar jamae hue
ghurur-e-fath ke parcham hava men lahrate
sabat-o-azm ke unche alam uthae hue
hatheliyon pe liye aftab aur mahtab
baghal men kurra-e-arz-e-hasin dabae hue
utho aur uth ke inhen qafilon men mil jaao
jo manzilon ko hain gard-e-safar banae hue
qadam badhae hue hain mujahidan-e-vatan
mujahidan-e-vatan hain qadam badhae hue
Leave a Reply