Har Ghadi Chalti Hai Talwar Tere Kuche Mein

har ghadi chalti hai talvar tire kuche men

roz mar rahte hain do chaar tire kuche men

haal sar ka mire zahir hai tire kya kiije

koi sabit bhi hai divar tire kuche men

shakl ko kyunki na har dafa badal kar aauun

hain miri taak men aghyar tire kuche men

gham se badli hai miri shakl to be-khauf-o-khatar

din ko bhi aate hain sau baar tire kuche men

na kare su-e-chaman bhuul ke bhi rukh hargiz

aan kar bulbul-e-gulzar tire kuche men

naragistan na samajh kholi hui ankhon ko

hain tire talib-e-didar tire kuche men

laae jab ghar se to behosh pada tha ‘arif’

ho gaya aan ke hoshiyar tire kuche men

Leave a Comment