mohabbat mohabbat javānī javānī
diloñ kā fasāna nazar kī kahānī
nigāhoñ ko do izn-e-afsāna-goī
murattab karo koī rañgīñ kahānī
ye aañsū haiñ tum khel sakte ho in se
sitāre na samjho inheñ āsmānī
ġhamoñ ke sahāre jiye jā rahā huuñ
tirā dard hai hāsil-e-zindagānī
hasīñ fursateñ hoñ mayassar to sun lo
nazar meñ liye phir rahā huuñ kahānī
tasavvur se māñgī hai ‘altāf’ maiñ ne
bahāroñ meñ Duubī huī ik javānī