jo ain vasl men aram se nahin vaqif
vo matlab-e-dil-e-khud-kam se nahin vaqif
hansa chaman men jo dil dekh surat-e-sayyad
ye murgh daane se aur daam se nahin vaqif
tamam shahr men jis ke liye hue bad-nam
vo ab talak bhi mire naam se nahin vaqif
har ek ishq ke kab qaede se mahram hai
hanuz shaikh alif laam se nahin vaqif
hazar haif yahan chhat se lag gaiin ankhen
vahan vo shokh lab-e-bam se nahin vaqif
dila abas talab-e-bosa hai tujhe us se
vo laal-e-lab ki lab-e-jam se nahin vaqif
saji hai lek use zar kulah guzri ki
faqir atlas-o-pilam se nahin vaqif
tapish se dil ki khabar hove hai yahan maalum
main tarz-e-nama-o-paigham se nahin vaqif
na khush visal men ho rakh tu yad-e-hijr ‘nasir’
magar tu gardish-e-ayyam se nahin vaqif