Sadiyon Ke Baad Hosh Mein Jo Aa Raha Hun Main

sadiyoñ ke baad hosh meñ jo aa rahā huuñ maiñ

lagtā hai pahle jurm ko dohrā rahā huuñ maiñ

pur-haul vādiyoñ kā safar hai bahut kaThin

le jā rahā hai shauq chalā jā rahā huuñ maiñ

ḳhālī haiñ donoñ haath aur dāman bhī taar taar

kyuuñ ek musht-e-ḳhāk pe itrā rahā huuñ maiñ

shauq-e-visāl-e-yār meñ ik umr kaaT dī

ab baam o dar saje haiñ to ghabrā rahā huuñ maiñ

shāyad varaq hai paḌh liyā koī hayāt kā

ban kar faqīh-e-shahr jo samjhā rahā huuñ maiñ

sāhil pe baiThā dekh ke maujoñ kā iztirāb

uljhī huī sī gutthiyāñ suljhā rahā huuñ maiñ

Leave a Comment