Athar Nafees
dam-ba-dam baḌh rahi hai ye kaisi sada shahr vaalo suno
jaise aa.e dabe paanv sail-e-bala shahr vaalo suno
ḳhaak uḌati na thi is tarah to hava us ko kya ho gaya
dekho avaz deta hai ik saneha shahr vaalo suno
ye jo raton men phirta hai tanha bahut hai akela bahut
ho sake to kabhi us ka bhi majra shahr vaalo suno
ye hamin men se hai us ke ranj-o-alam us se puchho kabhi
haan suno us ki rudad-e-mehr-o-vafa shahr vaalo suno
us ke ji men hai kya us se puchho zara dekhen kahta hai kya
kis ne us shaḳhs par koh-e-gham Dha diya shahr vaalo suno
umr bhar ka safar jis ka hasil hai ik lamha-e-muḳhtasar
kis ne kya kho diya kis ne kya pa liya shahr vaalo suno
us ki be-ḳhvab ankhon men jhanko kabhi us ko samjho kabhi
us ko bedar rakhta hai kya vaqi.a shahr vaalo suno
Leave a Reply