azar-o-jafa-e-paiham se ulfat men jinhen aram nahin
vo jiite hain lekin un ko marne ke siva kuchh kaam nahin
aflak ki gardish se dam-bhar duniya men hamen aram nahin
vo din nahin vo ab raat nahin vo sub.h nahin vo shaam nahin
kyuun ham ne mohabbat ki un se diqqat men phanse zahmat men phanse
aghaz hi men dil men kahta tha achchha us ka anjam nahin
is ka bhi alam us ka bhi qalaq ye gham bhi hamen vo gham bhi hamen
jiine ko ghanimat samjhe the jiine men magar aram nahin
gulshan men ḳhizan ab aa pahunchi mai-ḳhane men ji kyuun kar bahle
vo rang nahin vo lutf nahin vo daur nahin vo jaam nahin
har saans se aati hai ye sada marne ke liye tayyar raho
jiine se nahin kuchh dilchaspi jiine se hamen kuchh kaam nahin
qatil ko ye samjha de koi naale se fughan se shevan se
bismil na karun main ai ‘bismil’ to bismil mera naam nahin
Leave a Reply