kaifi-azmi

Ek Lamha

jab bhi chuum leta huun un hasin ankhon ko

sau charagh andhere men jhilmilane lagte hain

khushk khushk honton men jaise dil khinch aata hai

dil men kitne aine thartharane lagte hain

phuul kya shagufe kya chand kya sitare kya

sab raqib qadmon par sar jhukane lagte hain

zehn jaag uthta hai ruuh jaag uthti hai

naqsh admiyat ke jagmagane lagte hain

lau nikalne lagti hai mandiron ke siine se

devta fazaon men muskurane lagte hain

raqs karne lagti hain muraten ajanta ki

muddaton ke lab-basta ghaar gaane lagte hain

phuul khilne lagte hain ujde ujde gulshan men

tishna tishna giiti par abr chhane lagte hain

lamha bhar ko ye duniya zulm chhod deti hai

lamha bhar ko sab patthar muskurane lagte hain

More Poems

Leave a Comment