Pandit Daya Shankar Naseem Lakhnavi
us zulf ke ḳhayal ka milna muhal tha
jab tak muue bilon se nikalna muhal tha
dete na chaaT agar lab-e-shirin ke zikr ki
machle tha tifl-e-ashk bahalna muhal tha
piiri men tarz-e-ishq-e-javani vahi raha
surat ke saath dil ka badalna muhal tha
qatil tiri gali men hue sab ke sar qalam
kaise the kuche rasta chalna muhal tha
shukr-e-ḳhuda buton se huiin garm-joshiyan
patthar ka misl-e-shisha pighalna muhal tha
sar tan se kaT ke laaya shagufa hamara ḳhuun
shaḳh-e-sinan ka phulna phalna muhal tha
ḳhat ka ghubar chhup na saka ru-e-yar se
atish se gul ke ḳhaar ka jalna muhal tha
mahfil men un ko itr diya hoga ghair ne
yaron ke gham men hathon ko malna muhal tha
umr-e-ravan ko ankhon se dekha chala jo yaar
kya kiije bigḌe dil ka sambhalna muhal tha
dil garmi-e-ḳhayal se surat-bandhi ‘nasim’
us sim-tan ka sanche men Dhalna muhal tha
Leave a Reply