ḳhvabon ki dastaras men na ankhon ki had men hai
imkan-e-vasl gard-e-masafat ki zad men hai
likkha hua tha hijr hamare nasib men
ye istinad teri tamanna ke rad men hai
dasht-e-gham-e-firaq men bhaTke hue hain ham
sad-shukr teri yaad hamari rasad men hai
ahl-e-junun hain razm-gah-e-haq men jan-ba-kaf
talqin-e-dast-bastagi bazm-e-ḳhirad men hai
main kya huun main to ḳhaak huun aur meri zindagi
ik amr-e-kun-fakan hai jo ḳhaki jasad men hai
Leave a Reply