Jarrar Chhaulisi
kis roz ham ne ah-o-fughan men basar na ki
thi raat kaun si jo taḌap kar sahar na ki
is daur-e-ḳhud-gharaz men ye ḳhuddari-e-nigah
dam par bhi ban ga.i su-e-saqi nazar na ki
bazm-e-jahan se jaate hue kyon kisi ne bhi
muḌ kar nigah-e-janib-e-divar-o-dar na ki
ye ehtiyat-e-pas-e-mohabbat to dekhiye
karni thi un se gham ki shikayat magar na ki
kotahi-e-nazar thi ki na-qadri-e-suḳhan
‘jarrar’ ham ne pesh mata-e-hunar na ki
Leave a Reply