chehron men nazar aa.en ankhon men utar jaa.en
ham tujh se juda ho kar har samt bikhar jaa.en
din bhar ki mashaqqat se thak haar ke ghar jaa.en
aur apni hi dastak ki avaz se Dar jaa.en
achchha hai ki ham apne hone se mukar jaa.en
ya apni ḳhabar de kar chupke se guzar jaa.en
jis shahr bhi ham jaise barbad-e-nazar jaa.en
auraq musavvir ke tasvir se bhar jaa.en
uḌte hue patton ne mausam ki ḳhabar di hai
ham phir se sanvarne ko ik baar bikhar jaa.en
phulon ki qaba pahnen ḳhvabon ki dhanak oḌhen
ham qarya-e-janan men kyuun ḳhak-basar jaa.en
Leave a Reply