dil Mein Ek Taswir Chhupi Thi Aan Basi Hai Aankhon Mein

Bashir Badr

dil men ik tasvir chhupi thi aan basi hai ankhon men

shayad ham ne aaj ghazal si baat likhi hai ankhon men

jaise ik harijan ladki mandir ke darvaze par

shaam diyon ki thaal sajae jhank rahi hai ankhon men

is rumal ko kaam men laao apni palken saaf karo

maila maila chand nahin hai dhuul jami hai ankhon men

padhta ja ye manzar-nama zard aziim pahadon ka

dhuup khili palkon ke uupar barf jami hai ankhon men

main ne ik novel likkha hai aane vaali subh ke naam

kitni raton ka jaaga huun niind bhari hai ankhon men