kuchh aisa utra main us sang-dil ke shishe men
ki chand saans bhi aa.e na apne hisse men
vo ek aise samundar ke ruup men aaya
ki umr kaT ga.i jis ko ubuur karne men
mujhe ḳhud apni talab ka nahin hai andaza
ye ka.enat bhi thoḌi hai mere kaase men
mili to hai miri tanha.iyon ko azadi
juḌi hui hain kuchh ankhen magar dariche men
ghanim bhi koi mujh ko nazar nahin aata
ghira hua bhi huun charon taraf se ḳhatre men
mira shu.ur bhi shayad vo tifl-e-kam-sin hai
bichhaḌ gaya hai jo gumrahiyon ke mele men
hunar hai sha.iri shatranj shauq hai mera
ye ja.idad ‘muzaffar’ mili hai virse men
Leave a Reply