Poet
dard-o-gham aaj bhi hai ah-o-fughan aaj bhi hai
tirgi ka vahi sailab-e-ravan aaj bhi hai
ai masiha nafso tum ko ḳhabar hai ki nahin
dil ki basti se mire uThta dhuan aaj bhi hai
hai ghalat da.ava-e-mashshatgi-e-kakul-e-dahr
gesu-e-zist pareshan yahan aaj bhi hai
kyon sar-e-sham mizha se miri taare TuuTe
chandni ka vahi pur-kaif saman aaj bhi hai
de ḳhabar ja ke koi shahr-e-butan men ki ‘nadim’
qadr-dan-e-sitam-e-gul-badnan aaj bhi hai
Leave a Reply