Saghar Siddiqui
charagh-e-tur jalao baḌa andhera hai
zara naqab uThao baḌa andhera hai
abhi to sub.h ke mathe ka rang kaala hai
abhi fareb na khaao baḌa andhera hai
vo jin ke hote hain ḳhurshid astinon men
unhen kahin se bulao baḌa andhera hai
mujhe tumhari nigahon pe e’timad nahin
mire qarib na aao baḌa andhera hai
faraz-e-arsh se TuuTa hua koi taara
kahin se DhunD ke laao baḌa andhera hai
basiraton pe ujalon ka ḳhauf taari hai
mujhe yaqin dilao baḌa andhera hai
jise zaban-e-ḳhirad men sharab kahte hain
vo raushni si pilao baḌa andhera hai
ba-nam-e-zohra-jzbinan-e-ḳhitta-e-firdaus
kisi kiran ko jagao baḌa andhera hai
Leave a Reply