Wali Aasi
tujh se bichhaḌ ke yuun to bahut ji udaas hai
lekin ye lag raha hai ki tu mere paas hai
dariya dikha.i deta hai har ek reg-zar
shayad ki in dinon mujhe shiddat ki pyaas hai
hairat se sab ko takte hain patthar bane hue
jadugaron ke shahr men apna nivas hai
tum ko suna raha hai latife jo raat din
vo aadmi to tum se ziyada udaas hai
viran hai mera ghar bhi usi tarah dosto
college men jis tarah koi urdu class hai
puchho koi saval milega ghalat javab
‘vali’ har ek shaḳhs yahan bad-havas hai
Leave a Reply