har saans jo aati hai sitamgar qafas men
khinche hai miri jaan sar-e-dar qafas men
dekhe bhi to kya apni masiha.i ka anjam
jhanke bhi to kya nargis-e-bimar qafas men
atraf hain taqat ke takabbur ki salaḳhen
zalim hai ḳhud apna hi giraftar qafas men
par kaTne vaale ko ye malum nahin hai
rukte hain kahin azm ke par-dar qafas men
ye phuul hain ye sabza hai ye bad-e-saba hai
arman sanjo laa.e hain ghar-bar qafas men
azadi bhi hazir hai to parvaz bhi maujud
ḳhvabon ne laga rakkha hai darbar qafas men
sayyad hamen teri ḳhuda.i bhi thi taslim
hota jo tasavvur bhi giraftar qafas men
Leave a Reply