Afroz Rizvi
tujh se taalluqat ki tajdid ke liye
main ne charagh haath men ummid ke liye
phaili hai mere dil men tire dil ki raushni
lamhat-e-fikriya hain ye khurshid ke liye
ik sher tujh pe is tarah likkhun ki jis tarah
momin ka sher ghairat-e-nahid ke liye
chheda hai ek naghma-e-shirin bhi ku-ba-ku
dil ne hilal-e-id ki taid ke liye
su-e-falak nazar jo uthi to vuzu kiya
meri zaban ne kalma-e-tauhid ke liye
mere labon ne aaj qaside bahut padhe
apne khuda-e-pak ki tamjid ke liye
uthenge aaj meri taraf jab tire qadam
koi khabar na aaegi tardid ke liye
dekhun tujhe to daman-e-tausif kah uthe
ik harf bhi mile nahin tanqid ke liye
main sochti huun dasht-e-tamanna men aaj shab
ankhen taras na jaaen tiri diid ke liye
lekin mujhe yaqin hai tire asman par
utregi chand raat miri iid ke liye
Leave a Reply