dil men tasvir tiri aankh men asar tire
zakhm hathon men liye phirte hain bimar tire
ai shab-e-ranj-o-alam dekh zara rahm to kar
aah kis karb men rahte hain azadar tire
zoam hai tujh ko agar apne qabile pe to sun
mere qadmon men gire the kabhi sardar tire
aaj bazar men laai gai jab teri shabih
bhagte daudte aa pahunche kharidar tire
samne kyuun tiri ismat pe uthi hai ungli
kyon ye charche hain musalsal pas-e-divar tire
in ke dukh-dard ka tujh se bhi mudava na hua
apni halat pe jo hanste rahe fankar tire
mujh se phir chhutte hue abr-e-alam ne ye kaha
aaj ki shaam palat aenge gham-khvar tire
jaane kya rang ‘rabab’ ab unhen degi duniya
kis qadar dard se labrez hain ashar tire
Leave a Reply