Mohsin Asrar
der se so kar uThne vaalo taḌpo lekin shor na ho
tum ko haq hai a.inon ko toḌo lekin shor na ho
ham-sa.e ka sukh to us ke ḳhvab ka puura hona hai
tum par riqqat taari ho to ro lo lekin shor na ho
shaam Dhale parvaz simaT kar shaḳhon par aa jaati hai
apni ankhen rahguzar men rakkho lekin shor na ho
divane bhi ahl-e-sama.at ki ḳhidmat kar sakte hain
dil honTon par aa jaa.e to bolo lekin shor na ho
‘mohsin’ kis ko fursat hai jo tesha le kar aa.e yahan
apne but ko apne haath se toḌo lekin shor na ho
Leave a Reply