Fasurda dagh-E-Jigar dil-Ruba Nahin Rahta

Poet

fasurda dagh-e-jigar dil-ruba nahin rahta

charagh ishq ka hargiz bujha nahin rahta

baghal men rashk se dil dil-ruba nahin rahta

khafa hai ye ki tu mujh se khafa nahin rahta

hamesha husn sun ai bevafa nahin rahta

kabhi zamana sada ek sa nahin rahta

bujhi jo shama to parvanon pe hua raushan

ki baad-e-marg koi ashna nahin rahta

kahan vo girya vo naala vo jan-ba-lab rahna

kisi ka kaam hamesha bana nahin rahta

khuda-na-khasta tum to sanam nahin aise

tumhare dil men to kiina sada nahin rahta

kaha jo main ne ki ai rashk-e-mah ghar men mire

tu mehrbani se kyuun ik zara nahin rahta

laga ye kahne ki haan haan hai ye bhi apna shauq

nahin nahin nahin rahta huun ja nahin rahta

jo mujh ko kahiye main ankhon se zabt-e-girya karun

mira qusur nahin dil mira nahin rahta

yahan mujhe hi nasihat ko hain sabhi maujud

vahan to hosh kisi ka baja nahin rahta

ye dagh-e-ishq hai kyun-kar na gul khile is ka

hazar is ko chhupao chhupa nahin rahta

jo dil liya hai to bosa bhi do samajh rakkho

ki bad-moamlagi men maza nahin rahta

lagai taak hai kyuun mohtasib ne tujh pe dila

agar tu dukhtar-e-raz se bhala nahin rahta

na khinch tegh tu ‘ehsan’ na-tavan pe aah

miyan ye zor kisi ka sada nahin rahta