nafas nafas hai bhanvar chaḌhti shab ka manzar hai
hisar-e-jism men ik chiḳhta samundar hai
hava-e-taza ke manind mat lipaT mujh se
ga.i ruton ka bahut zahr mere andar hai
nikal ke ja.un gunah-gar-e-tirgi se kidhar
har ek haath men ab raushni ka patthar hai
ik aag uḌti hui si vahi ta.aqub men
badan ki raakh abhi shayad badan ke andar hai
tu kyuun uḌhata hai mujh ko ye raushni ki rida
mujhe ḳhabar hai andhera mira muqaddar hai
salib-e-shab se ‘musavvir’ sahar ke maqtal tak
kahan milen ki har ik fasla barabar hai
Leave a Reply