Sarfraz Nawaz
yuun uḌati hai jo hava mujh ko
pahle halka bahut kiya mujh ko
muddaton se yahan muqaffal huun
aa kabhi aa ke khaTkhaTa mujh ko
aḳhiri vaqt aa gaya hai kya
de rahe hain sabhi dua mujh ko
tujh tak aane kabhi nahin dega
mere hisse ka da.era mujh ko
roz-marra ki is kahani men
koi kirdar to bana mujh ko
ishq adab hai to apne aap aa.e
gar sabaq hai to phir paḌha mujh ko
kar ke sauda jo paanv ka baiTha
de gaya koi rasta mujh ko
vo koi aam sa hi jumla tha
tere munh se bura laga mujh ko
Leave a Reply