Qamar Raza Shahzad
na apne-ap ko is tarah dar-ba-dar rakhte
palaT ke aate agar ham bhi koi ghar rakhte
ajiib vahshat-e-shab thi ki shaam Dhalte hi
tamam log munDeron par apne sar rakhte
jo apni fat.h ke nashshe men chuur the vo bhala
sulagte shahar ke manzar pe kya nazar rakhte
ye aur baat ki sarsabz the bahut lekin
ham aise peḌ na ban paa.e jo samar rakhte
jinhen hava ki rifaqat aziiz thi ‘shahzad’
vo apne paanv bhala kya zamin par rakhte
Leave a Reply