vo agar ab bhi koi ahd nibhana chahe
dil ka darvaza khula hai jo vo aana chahe
ain mumkin hai use mujh se mohabbat hi na ho
dil bahar-taur use apna banana chahe
din guzar jaate hain qurbat ke na.e rangon se
raat par raat hai vo ḳhvab purana chahe
ik nazar dekh mujhe!! meri ibadat ko dekh!!
bhuul pa.ega agar mujh ko bhulana chahe
vo ḳhuda hai to bhala us se shikayat kaisi?
muqtadir hai vo sitam mujh pe jo Dhana chahe
ḳhuun umaD aaya ibarat men, varaq chiḳh uThe
main ne vahshat men tire ḳhat jo jalana chahe
noch Dalungi use ab ke yahi socha hai
gar miri aankh koi ḳhvab sajana chahe
Leave a Reply