Zaheer Kashmiri
parvana jal ke sahab-e-kirdar ban gaya
lekin jamal-e-sham.a gunahgar ban gaya
ham dil-zade jo sair-e-chaman ko nikal paḌe
har phuul dast-e-shaḳh men talvar ban gaya
imshab tulu-e-yar ka manzar ajiib tha
bam-e-buland matla-e-anvar ban gaya
ai mahvashan-e-shahr miri bandagi karo
main ḳhud sanvar ke aks-e-ruḳh-e-yar ban gaya
vo daur the nazar pe hijab-e-ghurur tha
vo chal diye main dida-e-bedar ban gaya
jab ḳhamushi hi bazm ka dastur ho ga.i
main aadmi se naqsh-ba-divar ban gaya
mahsus kar raha huun ki tanha huun in dinon
har shahar garche misr ka bazar ban gaya
jis ham-nafas ko mujh se mata-e-vafa mili
vo ham-nafas mira hi ḳharidar ban gaya
Leave a Reply