Pritpal Singh Betab
dhyan dastak pe laga rahta hai
aur darvaza khula rahta hai
kisi malbe se nahin pur hota
mere andar jo ḳhala rahta hai
khinchta hai vo lakiren kya kya
aur phir un men ghira rahta hai
ham ko ḳhamosh na jaano sahab
andar ik shor bapa rahta hai
mujh ko de deta hai gahre paani
ḳhud jaziron pe basa rahta hai
meri tanha.i ki pagDanDi par
mere ham-rah ḳhuda rahta hai
ḳhaak bhi rahti nahin insan ki
naam patthar pe khuda rahta hai
rang-o-bu bharte hain is ka paani
mazbale par jo paḌa rahta hai
qumqume rahte hain raushan ‘betab’
dil hi kam-baḳht bujha rahta hai
Leave a Reply