Dhyan Dastak Pe Laga Rahta Hai

dhyān dastak pe lagā rahtā hai

aur darvāza khulā rahtā hai

kisī malbe se nahīñ pur hotā

mere andar jo ḳhalā rahtā hai

khīñchtā hai vo lakīreñ kyā kyā

aur phir un meñ ghirā rahtā hai

ham ko ḳhāmosh na jaano sāhab

andar ik shor bapā rahtā hai

mujh ko de detā hai gahre paanī

ḳhud jazīroñ pe basā rahtā hai

merī tanhā.ī kī pagDanDī par

mere ham-rāh ḳhudā rahtā hai

ḳhaak bhī rahtī nahīñ insāñ kī

naam patthar pe khudā rahtā hai

rañg-o-bū bharte haiñ is kā paanī

mazbale par jo paḌā rahtā hai

qumqume rahte haiñ raushan ‘betāb’

dil hī kam-baḳht bujhā rahtā hai

Leave a Comment