Sarfraz Zahid
kabhi honTon pe aisa lams apni aankh khole
ki bosa ḳhud-kushi karne se pahle muskura de
koi aansu chamakne men hamara saath deta
to zohra aur atarid apne ghar ki raah lete
laja kar raat ne kuchh aur bhi ghunghaT nikala
talab ne jism pahna shauq ne gahne utare
tasavvur men Tahalte ḳhal-o-ḳhad kya chahte hain
udasi se kaho tasvir ki ankhon se puchhe
dukan ik samne aisi achanak aa ga.i thi
jahan mumkin na tha ham apni jebon men samate
bhikaran jaate jaate pichhe muḌ kar dekh le to
main us ke naam kar duun dil ke maftuha ilaqe
utar atin tire jhilon pe sustane ko Daren
to us din ham bhi apne ghaar se bahar nikalte
Leave a Reply