Farhan Salim
kya bata.en kya kal shab aḳhiri pahar dekha
kar-gah-e-gardun par chand ka safar dekha
jalva-gah-e-hasti men husn jalva-gar dekha
haa.e ham-nafas mat puchh kab kahan kidhar dekha
aah vo shab-e-pur-nam uf vo nuur ki mahfil
darmiyan sitaron ke jalva-e-qamar dekha
us jamal-e-uryan ko sirf ik nazar dekha
phir vahi nazar aaya jab jahan jidhar dekha
haa.e ai mujassam husn rashk-e-nur-o-tabani
tu ne mere ḳhirman ko ḳhuub phunk kar dekha
shab Dhali to ai ‘salim’ mah nasheb men utra
ik chakor ko dekha aur ba-chashm-e-tar dekha
Leave a Reply