patthar ke ratjage miri palkon men gaaḌ ke
rakh diin tire firaq ne ankhen ujaaḌ ke
itni tavil apni masafat nahin magar
mushkil-mizaj hote hain raste pahaḌ ke
ankhon se ḳhadd-o-ḳhal nikale na ja sake
har-chand phenk di tiri tasvir phaaḌ ke
ye bholpan nahin hai ki suraj ke as-pas
rakkhe ga.e hain da.ere kanTon ki baaḌ ke
miTTi men mil ga.i hai tamanna milap ki
kuchh aur gir paḌe hain kinare daraḌ ke
be-mehr mausamon ko nahin janta abhi
ḳhush hai jo sa.eban se ta.alluq bigaḌ ke
patthar ke jism men tujhe itna kiya talash
‘mansur’ Dher lag ga.e ghar men kabaḌ ke
Leave a Reply